زمان و مکان هیئت قمر بنی هاشم مرند

روز های پنجشنبه , وفات و اعیاد
حسینیه قمر بنی هاشم(ع) - خیابان شهدا
با حضور مداحان و قاریان هیئت
مشخصات مطلب شماره ی 2079 ارسالی توسط مدیر سایت
متن شعر عرض نیاز به درگاه الهی از استاد فانی تبریزی
متن شعر عرض نیاز به درگاه الهی از استاد فانی تبریزی

دل غصّه و غمدن يئتشوب جانه الهي
رحم ايله من زار و پريشانه الهي

مين درده سالوبدور مني بو دور زمانه
امّيد يوخوم‌دور داخي درمانه الهي

مجنون كيمي بو عاشق دلخسته و رنجور
دوشسون نَقَدر كوه و بيابانه الهي

وصلوندي فقط چاره دل عاشق زاره
بولمم نَدَن اولموش اودا افسانه الهي

رحم ايله كرم قيل ئولورم لطفيله بير باخ
باغريم بَلَه‌شيب گورنه قزل قانه الهي

فرياد و فغان اولدي ايشيم هر گئجه گوندوز
گل رحم ايله بو عاشق نالانه الهي

بير عبد گنهكارم و شرمنده و مسكين
عفو ايله مني شاه شهيدانه الهي

نفسيم‌دي مني غرق ايلين بحر گناهه
اولدور اوني تا گلميه جولانه الهي

باشيم آغاريب ليك يوزوم قاره‌دي نيليم
چوخ وار نيازيم بخشش و احسانه الهي

مهمانووام اي پادشه بنده نوازيم
احسان و كرم ايله بو مهمانه الهي

حيرتده قالوب طالب عرفان و حقيقت
باخ لطفيله بو بيدل حيرانه الهي

آخر نفسيم دور منه بير مرحمت ايله جانا
تا جان وئريم اول دلبر جانانه الهي

يوخدور خبر اول يار پريچهره‌دن اي واي
ياندي اورگيم آتش هجرانه الهي

چوخداندي يانير درد فراقه دل زاريم
يار گلمه‌سه بودل اولي ديوانه الهي

اندوه و محن  چولقالييب كلّ جهاني
گؤندر گله اول حجّتي امكانه الهي

مهدي گله‌گر چاره قيلار درد جهانه
گلسه اويئتر ظلم‌ده پايانه الهي

قرآن و ولايتدي فقط خلقي اوجالدان
بونلار يئتيرر سالكي عرفانه الهي

هم اهل ولايتدن ايله فاني زاري
هم عارف‌ايله قلبيني قرآنه الهي

«عطّار حسيني»‌‌له بو «طاهاي » عزيزي
دعوت ايله بير وقفه خراسانه الهي